كثير من الناس بتبدأ الدايت بكل حماسة لكن بمرور أسبوع و الثانى , شهر و الثانى , بتبدأ الحماسة تقل و الملل يزيد و الإرادة تضعف و اللغبطة تزيد و فجأة نبطل دايت , و بعد فترة نبدأ دايت تانى وهكذا نفضل فى دايرة مش بتتقفل , هقولك على شوية حاجات تعمليها تخليكى تقدرى تستمرى أطول فترة ممكنة على الدايت بدون لخبطة .
علشان تقدرى تستمرى أطول فترة ممكنة على الدايت , لازم تعرفى الأول إيه الأسباب اللى بتخليكى تفشلى فى الإستمرار على الدايت , هل الملل ؟ , الجوع ؟ , الحرمان ؟ , الإحباط ؟ , ولا قليلاً من هذا و ذاك ؟ , هحاول أتعرض لمعظم الأسباب اللى بتخلينا نفشل نستمر فى الدايت و أعرض شوية حلول مقترحة ممكن تفيدك , يالا بينا
1- أختيار نظام غذائى خاطئ :
أحد أهم الأسباب للفشل فى الإستمرار على الدايت هو أختيار دايت غير مناسب ليكى , ولا لنظام حياتك , لو الدايت اللى انتى اخترتيه صعب , هيبقى من المستحيل إنك تستمرى عليه , مش مهم النظام ناجح قد إيه ولا مهم إنه بيخسس 20 كيلو فى شهرين , كل ده مش هيبقى ليه لزمة لو بطلتى رجيم بعد أسبوع
الحل : إختارى نظام غذائى تحبية و تقدرى تتعايشى معاة و مناسب لطبيعة حياتك و لأنشطتك اليومية , الدايت الناجح هو الدايت المستمر .
2- الملل :
واحد من أهم أسباب الفشل فى الاستمرار , كل يوم بيض مسلوق , كل يوم صدر فرخه و زبادى لايت , يوم ورا يوم , أسبوع , أثنين , لازم هتوصلى لمرحلة زهق , هتكرهى البيض المسلوق و هتكرهى الزبادى و تكرهى حياتك كلها
الحل : أبعدى تماماً عن الروتين فى الدايت , دايماً دورى على النت و فى الكتب على وصفات لوجبات صحية و غيرى نظام أكلك كل اسبوع , حاولى تدورى على وصفات صحية للوجبات اللى بتحبيها , و دخلى نظامك الغذائى أكلات جديدة دايماً , علشان تفضلى تحسى بالتنوع اللى هيخليكى تستمرى على الدايت أطول فترة ممكنة
3- الإحباط :
أكيد كلنا بنبقى مليانين حماس فى بداية الدايت , لكن بعد مرور أسبوع و أثنين و نلاقى نزول الوزن مش زى ما كنا بنتمنى هيجيلنا أحباط و نهاية الأحباط أكيد هتكون التخلى عن الدايت و الرجوع لنمط حياتك القديم
الحل : بلاش تحطى لنفسك أهداف غير منطقية , مينفعش تخسى 10 كيلو فى شهر واحد , خلاف إنه كلام مش منطقى هو أصلا مش صحى , و لو حصل هيبقى بثمن باهظ من صحتك , و مش هتقدرى تكملى على نفس الدايت ده فترة طويلة , نزول وزن قليل كل اسبوع لمده طويله , أحسن من نزول سريع هيجى بعدة زيادة أسرع .
4- الجوع :
الجوع بيأثر على العقل و يخليه ياخد قرارات غير سليمة تحت تأثير الجوع و الرغبه الملحة فى تناول الطعام و طبعاً لو ماشيين على دايت بيخلينا جعانين طول الوقت مش هنقدر نستمر علية و غالباً هنبطلة بسرعة
الحل : حاولى تقسمى وجباتك على مدار اليوم بحيث متعديش 3 ساعات غير و انتى بتاكلى حاجة سواء وجبة أو سناك , كلى خضروات طازجه و بروتين علشان تقللى إحساسك بالجوع , لو غداكى صدر فرخه و طبق سلطة كلى الصدر دلوقتى و السلطة بعدها بساعة , المهم متقدعيش فترة طويلة بدون أكل علشان متحسيش بجوع
5- الحرمان :
من خبرتى أعتقد إن الحرمان من بعد الأكلات هو السبب الأهم و الرئيسى لفشل معظم إنظمه الدايت , ببساطة الممنوع مرغوب , حتى لو نفسك مش بتروح للحلويات لو حد قالك ممنوع تاكليها , هتلاقى نفسك مش عايزة حاجة فى الدنيا غير الحلويات
الحل : ببساطة متحرميش نفسك من حاجة , لازم تاكلى كل حاجة مضرة علشان تبطليها , واضحة دى ؟ , لا طبعاً , قصدى إن لما عقلك يعرف إن الحاجة دى متاحة و يقدر ياكلها هيبدأ يتعامل معاها بعقلانية , طيب هل دى حاجة مفيدة ولا لا , طيب هى أحسن ولا ثمرة فاكهة , طيب أكل قطعتين ولا نص قطعه كفاية , إنما لو وصلتى لعقلك إنه ممنوع من أكلها , هيتجنن و هيبقى كل هدفة أنه يحصل عليها و لو حصل و بدأ مش هينتهى .
طيب ليه مقولتش ضعف الإرادة , ببساطة لإن الإرادة بتضعف نتيجة سبب من الأسباب اللى فوق , إنتى بتضعفى لما تحسى بالجوع أو الأحباط أو الحرمان من الحاجة اللى بتحبيها أو الملل من نفس الأكل كل يوم , ضعف الإرادة مش سبب لفشل الرجيم فى حد ذاتة , إنما هو نتيجة لسبب أو مجموعة أسباب من اللى مكتوبة فوق , شوفى إيه من الأسباب اللى فوق اللى بيخلى إرادتك تضعف و تستلمى بسرعة وأتغلبى عليه و إنتى هتقدرى تستمرى على نظام غذائى لأطول فترة ممكنة
This is dummy text. It is not meant to be read. Accordingly, it is difficult to figure out when to end it. But then, this is dummy text. It is not meant to be read. Period.
ConversionConversion EmoticonEmoticon