دهون البطن مزعجه جداً , و مهما كان وزنك قليل لو عندك بطن جسمك مش هيبقى متناسق , و مش هتعرفى تلبسى اللبس اللى بتحبيه , بتعملى دايت وجسمك كله بيخس وبطنك لا ؟ , طيب إيه العمل ؟ , اقولك أنا
أولاً كده اكيد ناس كتير من اللى عاملين دايت , عاملين دايت علشان دهون البطن , و دى حاجه منتشره أوى خصوصاً فى الدول العربيه , ممكن يكون جسمك كويس , بس اكثر من نصف الشعب العربى بيعانى من الدهون المتراكمه فى منطقه البطن أو ما يعرف بالكرش .
اكيد كلنا شوفنا اعلانات فى التليفزيون , عن اعشاب و حبوب و اقراص لتخسيس الكرش , و اجهزه رياضيه و حزام تلبسيه و شورت يحرق الدهون , و كل الاعلانات اللى مالية التليفزيون دى .
طيب هل فعلاً الحاجات دى بتحرق دهون البطن , هل ممكن فعلاً اكل اى حاجه و البس حزام ساعه ولا اثنين حوالين وسطى , يحرقلى الدهون , أو اخد حبايه سحريه كل يوم تنزلى دهون جسمى ؟
قبل ما اجاوب على السؤال ده خلونى أشرحلكم علمياً كده , ايه هى الدهون دى و بتتراكم ازاى و ليه و انتم هتعرفوا الاجابه لوحدكم .
- كل البشر رجاله و ستات عندهم دهون فى جسمهم , طيب ايه هى السمنه ؟ , هى زياده الدهون المتراكمه فى الجسم , طيب ايه اللى بيزودها ؟ , هو ده السؤال .
الجسم البشرى بيحتاج طاقه علشان يشتغل و يفكر و يتحرك و يحافظ على اعضائه شغاله بكفاءه تامه . بيجيب الطاقه دى منين من الاكل , إفتراضاً للتبسيط إن جسمك محتاج 2000 سعر حرارى يومياً علشان يأدى بكفاءه , و انتى فضلت فتره تديله ال 2000 سعر دول كل يوم و هو بيحرقهم , و جيتى فيوم اديتيله 2500 سعر حرارى , هيستخدم ال 2000 اللى محتاجهم , و هيعمل ايه فى ال 500 الزيادة دول ؟! , بالظبط كده هيخزنهم علشان لما يحتاج فى المستقبل يبقى ياخد منهم , طيب نفترض بقى انك فضلتى كل يوم تديلوا 2500 سعر , هيفضل يخزن الدهون فى جسمك و ده اللى هيسببلك زياده فى الوزن .
طيب ليه الجسم بيخزن الدهون عندك فى منطقه البطن , لكن صاحبتك الدهون متوزعه فى جسمها كله , و صاحبتك الثانيه عندها دهون فى منطقه الرجل , أو الارداف , أو الصدر ؟؟ , ببساطة كده دى كلها جينات وراثيه , كل واحد مختلف عن الثانى , و المكان اللى جسمك هيخزن الدهون فيه , ملكيش أى تحكم فيه , و متقدريش تغيريه . و بنفس المنطق لما تيجى تدى جسمك 1500 سعر هيحرقهم و يستخدم المخزون من الدهون اللى عنده علشان يجيب ال 500 الباقيين , طيب هل في حاجه ممكن أعملها اخليه ياخد من دهون البطن و مش من الرجل أو الوش ؟ , لا مفيش , مفيش أى حاجه تجبر الجسم إنه يختار مصدر طاقه معين من مكان معين .
هل معنى كده إن أى مشروب , برشام , وصفه , أوجهاز رياضى , ميقدرش ينزلى دهون منطقه البطن بس ؟ , بالظبط كده , طيب إذا كانت الوسائل السحرية دى كلها مش هتجيب معايا نتيجة , أعمل إيه ؟
إيه الحل ؟؟
-الخطوة الأولى :علشان نجبر الجسم إنه يستخدم المخزون اللى عنده , لازم نكون بندخله سعرات اقل من اللى محتاجها علشان يضطر يلجأ لمخزون الدهون اللى فى الجسم .
- الخطوة الثانيه :
نوعيه السعرات الحرارية اللى بندخلها , الاكل الصحى المفيد , إقل عرضه أنه يتخزن كدهون من الاكل اللى نسبه الدهون فيه عاليه أو اللى معظمه سكر , زى العصائر المعلبه و البيبسى و الشيكولاته و الحلويات
- الخطوة الثالثة :
الكارديو ثم الكارديو ثم الكارديو , تمارين البطن مش هتحرقلك الدهون , هى هتقوى العضله لكن عمرها ما هتشيل الدهون المتراكمه حواليها , تمارين الكارديو بس هى اللى هتحرقلك الدهون اللى فى جسمك
- الخطوة الرابعه :-
ممارسة تمرينات رياضية بجانب الكارديو سواء body weight exercises ( زى العقله و الضغط و الغطس ) , أو weight training ( تمرينات الحديد ) , هيخلى عضلاتك أقوى و بالتالى هيزود سرعه الحرق عندك فى وقت الراحة , أكتر بكتير من الكارديو , بجانب إنه أحد الاسباب المهمة اللى تخلى جسمك يحرق الدهون فى وقت الدايت بدل ما يحرق عضلاتك و الله الحديد مش هيخليكى شبه الرجالة , إذا كانوا الرجاله نفسهم بيتعذبوا علشان يطلعوا عضلتين :D , بالعكس ده هيديكى مظهر اكثر رشاقة و أنوثه , و الدليل إن كل نجمات السينما سواء الاجنبيه أو حتى المصريه حديثاً بيلعبوا حديد فى الجيم عادى جداً .
كان نفسى يبقى عندى حل سهل و سريع افيدكم بيه , بس انا وعدتكم بالصراحة فمش هقدر اكدب عليكم , مفيش برشامه ولا اعشاب ولا مشروب ولا وصفه ولا تمرين ولا أى حاجه فى الدنيا هتنزل دهون البطن دوناً عن باقى جسمك .
مفيش حد من اللى بيبيع المنتجات دى هيقولك الكلام ده لأن كله عايز يبيع و الموضوع بقى تجارى , الخطوات اللى انا قلتها دى مع بعضها بترتيب أهميتهم بس اللى هيساعدوكى تنزلى دهون بطنك .
This is dummy text. It is not meant to be read. Accordingly, it is difficult to figure out when to end it. But then, this is dummy text. It is not meant to be read. Period.
ConversionConversion EmoticonEmoticon