و بدأت رحلة العذاب , و متابعة الانترنت و البرامج المختصة فى التليفزيون , و أكيد سمعتى أكثر من رأى و ساعات كتير أراء عكس بعضها و أخيراً قدرتى تختارى من وسط خضم الأنظمة الغذائية نظام تمشى عليه و بدأتى تنفذيه بحماس و تركيز لكن طبعاً سريعاً ما أصابك الفتور , هو هو نفس الأكل كل يوم , طول الوقت حاسه بجوع مش قادرة حتى تمارسى الانشطة العادية اليومية بتاعتك , لأنك مش متعودة على النظام الغذائى ده , بتبدأى تمارسى رياضة يمكن لأول مرة فى حياتك , طبعاً عذاب , فى أقل من دقيقة بتبدأى تنهجى و مش قادرة تكملى برضه لأن جسمك مش متعود على ممارسة نشاط زى ده .
لأن إرادتك قوية قدرتى تتحملى الفترة الأولى فى الرجيم و اللى غالباً بتبقى الأصعب , جسمك شوية شوية بيبدأ يتأقلم على النظام الغذائى و ينظم نفسه عليه , مبقتيش تحسى بجوع زى الأول , نفسك بتروح ساعات للحاجات اللى أنتى حرمتى نفسك منها , بس بتقدرى تمنعى نفسك , نفس الكلام بالنسبة للرياضة دلوقتى أسهل و أمتع و بدأتى تحسى بجسمك أخف و صحتك بشكل عام بقيتى تحسى أنها أفضل , نفسك أحسن , مبقاش فيه خمول ولا تعب , علطول نشيطه و قادرة تعملى كل أنشطتك بحماس و تركيز , برافو عديتى المرحلة الصعبة ووصلتى لوزنك المثالى بعد رحلة طويلة مجهدة بس ممتعة .
فجأه بتقررى إنك وصلتى لوزنك المثالى خلاص , مش لازم تاكلى أكل صحى , مش لازم تلعبى رياضة , بتعدى فترة و إنتى وزنك ثابت و معقول , ممكن تكونى بتزيدى ببطء غير ملاحظ , شوية بشوية وجبتك بدأت تزيد , بدأتى ترجعى للكميات اللى كنتى بتاكليها الأول , كل اللى منعتى نفسك منه رجعتك تاكليه و بشراهه , رجعنا ناكل أيس كريم بليل على السرير و أحنا بنتفرج على الفيلم , الشوكليت علطول فى شنطتنا , الوجبات السريعة كل أسبوع و ساعات كل يوم , و فجأة بدون مقدمات بدأتى تزيدى بصورة مهولة فى الوزن و رجعتى لوزنك القديم و يمكن أكتر .
دلوقتى هتأنبى نفسك و تندمى على ما فعلتى و تبدأى تدورى على رجيم جديد و تبدأى نفس الرحلة من أولها بنفس الطريقة و تتحول حياتك لمرحلة الرجيم و مرحلة ما بعد الرجيم
معظمنا بيمشى فى حياته بالطريقة دى , مع إننا ببساطة و بدون كل التعب ده كان ممكن نمشى على نظام غذائى متوازن ميحرمناش من حاجة و فى نفس الوقت يحافظ على وزننا , لو بصينا للموضوع من ناحية صحتنا مش من ناحية شكلنا , أكيد هنفكر بطريقة مختلفة , فى ناس محظوظه لأنها ببساطة مهما تاكل مش بتزيد فى الوزن , معدل الحرق عندهم عالى أو هما بيبذلوا مجهود و غالباً بتبقى مسألة خاصه بالجينات , لكن هل معنى ده أنهم فعلاً ياكلوا كل حاجة ؟ , حرفياً هل لو بوسيلة أو بأخرى قدرت إنى أخلى وزنى ميزدش إنى من حقى أدمر صحتى , هل مخاطر الأكل الغير صحى بتتلخص فى بس مشكلة زيادة الوزن ؟ بالطبع لا .
الأكل الغير الصحى هيسببلك مشاكل أخطر بكتير من زيادة الوزن , الأمراض القلبية , مرض السكر , إنسداد الشرايين , إرتفاع نسبة الكوليسترول , و فى بعض الأحيان السرطان لا قدر الله , عافانا الله و إياكم , لو بصيتى لعاداتك الغذائية من النظرة دى , أكيد هتختارى نمط حياة صحى أحسن بكتير من رحلات الرجيم , لو عرفتى قد إيه الرياضة مفيدة لجسمك مش بس وسيلة مساعدة تنزلى بيها وزنك , كنتى فضلتى محافظة على ممارستها بإنتظام , لو كنتى عملتى كدة كان زمانك حتى لما بطلتى رجيم محافظة على جزء كبير من رشاقتك بس لأنك دخلتى شوية عادات صحية فى نظامك اليومى .
متخليش الموضوع يا يمين أوى يا شمال أوى , شوية وسطية هيفدوكى كتير على المدى الطويل , شوية عادات غذائية صحية بسيطة مع شوية رياضة بسيطة منتظمه هيضمنولك حياة طويلة كلها صحة و نشاط بإذن الله , إختارى الأصح , إختارى اللى يفيدك
This is dummy text. It is not meant to be read. Accordingly, it is difficult to figure out when to end it. But then, this is dummy text. It is not meant to be read. Period.
ConversionConversion EmoticonEmoticon